चम्पेश्वर गोस्वामी
गोठ के गाड़ी: सब भागत हे जतर -खतर
एती तेती जतर -खतर
चारो कोती जतर -खतर
बाढ़े अड़बड़ एक्सीडेंट हे
पढ़, देखके होथे मन जतर -खतर
लापरवाही जीव लेवत हे
मनखे होगे हे जतर -खतर
अघवाये के होड़ मचे हे
सब भागत हे जतर -खतर
ये गोठ ला लगावत मन मोर बड़ विचलित हे, आये दिन समाचार मं पढ़े, देखे ला मिल जाथे कि कोनों करा दो बाईक सवार आपस मं टकराके दुर्घटना के शिकार होगे अउ ओखर मउका मं ही मउत होगे। कोनों करा कोनों चालक हा एक ठी गाड़ी ला ओवर टेक करत विपरीत दिशा ला आवत गाड़ीवाला संग टकरागे अउ उही करा एक लापरवाह चालक के सेती सही दिशाव मं गाड़ी चलावत बपरा सावधान चालक के मउत घलो मउत हो जाथे। लापरवाही ले मरना अलग बात हे, अउ लापरवाह के सेती बने सावधान मनखे के मरना चिंता के बात हे। कोनों कोनों मन तो अउ गजब ड्राइविंग करथे, ए मन तो आघू मं खड़े गाड़ी मं झपाके मर जाथे। अच्छा नइ लागे। भईया हो बेरा राहत घर ले निकलव हड़बड़ी मं गाड़ी मत चलावव। ये मनखे जनम के महत्व ला समझव।
सड़क मं अड़बड़ समस्या रहिथे, समस्या के निम्न लिखित कारण हे
पहला – सड़क मं दूनों तरफ ले गाड़ी चलथे, सब हड़बड़ी मं रहिथे
दूसरईया – जादातर सड़क मं गड्ढा के भरमार हे, वो गड्ढा अस्पताल वाला मन के फायदा करवा सकथे अउ आप मन के भरी नुकसान
तिसरईया- उही गड्ढा मं मतलाहा पानी भराये रहिथे वहू हा आप मन के गाड़ी के अउ आपके बड़े बैरी हे सावधान रहव।
चौथईया- सड़क मं गाय, बछरू, कुकुर मन के मालिकाना हक़ दिखथे जे मन मांछी के डर मं चिक्कन सड़क मं बइठना पसंद करथे
पांचवा – आप सब जानथव कि आप मन ले जादा जरुरी काम कुकुर मन ला रहिथे अउ ओमन बेफिकर होके रद्दा ला पार करथे
का कहंव अब
एक कोती ले ट्रक वाला ला जल्दी रिहिस दूसर कोती ले मोटर साइकिल वाला ला जल्दी रिहिस अउ उही बेरा मं कुकुर ला घलो जरुरी काम रिहिस अउ तीनों के भेंट संघरा होगे कुकुर तो बोचक दीस बड़े गाड़ी वाला सम्हालगे फेर बाइक सवार बपरा हा उहीच्च करा मरगे। टी भईया हो, दुर्घटना ले देरी सही, ये गोठ ला मान लेवव, खुद भी समझबो अउ दूसर ला घलो समझाबो अउ ठान लेवव
जरुरी हे जिनगी मं ध्यान देवव
ट्रेफिक सिग्नल के पालन करना
हेलमेट के महत्व समझना
गांव साहर के सड़क के पोठ होना
मवेशी, कुकुर मन बर सही जगह के होना
अउ सबले बड़े गुनान के गोठ ले समझदार होना
चिंता के बात हे
एक ठीन सड़क के अतका भीड़ मं मवेशी के विचारना, कुकुर के संख्या बढ़ना, सड़क-सड़क में गड्ढा होना अउ लापरवाही ले वाहन चलाना माने यमराज ला सीधा नेवता देना त भई – इही मोर गोठ के गाड़ी के सार हे
बड़ सुग्घर संसार हे
जीवव अउ जीयन देवव
जग मं मया के भरमार हे
जय जोहार
