छालीवुड – चम्पेश्वर गोस्वामी
पहिली सेंसर बोर्ड ले प्रमाण पत्र लेवव तेखर बाद रिलीज डेट के घोषणा करव, ये बड़ बढ़िया बात हे कि हमर छालीवुड इंडस्ट्री हा सरलग, सरपट दउड़त हे, नवा -नवा प्रतिभा हा फरत -फुलत हे। बाल कलाकार ले लेके जवनहा कलाकार मन है रील ले, सोशल मीडिया ले, अपन अलग चिन्हारी बनाके अपन प्रतिभा ले निर्माता -निर्देशक मन के ध्यान ला खींचत हे। अब कलाकार खुद अपन पैर मं बिना सहारा खड़े होवत हे, सफलता पावत हे। ये सुखद बात हे कि रील ले बड़े स्क्रीन तक प्रतिभा मन सम्मान पावत हे।
सुने के बात ये हे कि फिलीम बन जाथे, फिलीम के सब बूता एक -एक करके पूरा हो जाथे, रिलीज डेट घलो तय हो जाथे, निर्माता, निर्देशक कलाकार मन धुआं धार अपन फिलीम के प्रमोशन करथे फेर अचानक सूचना मिलथे कि सेंसर बोर्ड ले रिलीज के अनुमति हा रुकगे हे, तहां का हे किए कराये मं पूरा पानी फिर जाथे ये बहुत गुने के, चिंता के अउ भारी भरकम नुकसान के बात आय। ये बारे मं हमर छत्तीसगढ़ के निर्मता – निर्देशक मन के वॉचर लेके अपन ये पईत के ये कॉलम मं लिखके, कारण अउ उपाय ला आप मन के आघू लाये के प्रयास करे हंव।
मनोज वर्मा – सुप्रसिद्ध निर्देशक, राष्ट्रीय अवार्ड ले सम्मानित
आजकल सेंसर बोर्ड के नियम हा पहिली ले जादा कड़ा होगे हे, जेमा नवा -नवा नियम अउ जुड़गे हे, कोनों भी फिलीम जब सेंसर बोर्ड जाथे तब ओखर बहुत बारीकी ले परिक्षण होथे कि कहीं कोनों करा विवादित दृश्य तो नइ हे , अउ अभी सेंसर बोर्ड में आइडियो, कैप्शन अउ सब टाइटल जरूरी होगे हे, एखर ले बांचे बर निर्माता -निर्देशक कोनों डेट तय करत हे त बेरा राहत सब उपाय ल कर लय या फेर सेंसर बोर्ड ले प्रमाण पत्र मिले के बाद ही रिलीज डेट तय कर ले जादा अच्छा रही। बाकी अउ कोनों बात मोला नइ लगय। हमला नुकसान ने बचना हे त जरुरी तैयारी हम पहिली कर लेवव ये जरुरु हे.
मनोज वर्मा राष्ट्रीय अवार्ड ले सम्मानित सुप्रसिद्ध निर्देशक
अशोक तिवारी सुप्रसिद्ध गीतकार, फिलम लोक परलोक के निर्माता
मैं पहिली के अपन प्रोजेक्ट मं सेंसर ले अनुमति मिले के बाद रिलीज डेट के घोषणा करत रहे हों, फेर ये बारी सेंसर बोर्ड के कार्यालयीन व्यस्तता के कारण तय बेरा मं अनुमति नइ मिले ले निश्चित रूप ले हमर म्हणत अउ प्रचार -प्रसार मं प्रभाव परे हे, फेर अभी भी हमर मन के ऊर्जा कम नइ होय हे। हमन अपन आघू के प्रचार -प्रसार जारी रखत हुए नवा डेट के घोषणा सेंसर बोर्ड ले अनुमति मिले के बाद ही करबोन। मैं इंडस्ट्री के सबो निर्माता -निर्देशक मन ले निवेदन करहूं कि फिलीम के निर्माण सेंसर बोर्ड के नियम के बारीकी ला समझाव करय अउ पहिली सर्टिफिकेट ले लेवंय तेखद बाद ही सही अउ तय रिलीज डेट के घोषणा करंव।
अशोक तिवारी गीतकार निर्माता
धनेश सौ अउ आराधना साहू के अवईया फिलीम लोक परलोक अब नवा डेट मं रिलीज होही, ये फिलीम के छत्तीसगढ़ के जम्मों दर्शक मन अगोरा करत हे। प्यार, मोहब्बत, कॉमेडी, बेहतरीन गीत, संगीत अउ दृश्य ले भरय मनोरंजक फिलीम 7 अगस्त के अवईया रिहीस फेर सेंसर बोर्ड ले प्रमाण पत्र नइ मिले के कारण एखर रिलीज़ हा टलगे, अब तो निर्माता अशोक तिवारी हा सेंसर बोर्ड ले प्रमाण पत्र मिले के बाद ही दर्शक मन ला फिलीम देखे बर छत्तीसगढ़ के जम्मों थियेटर मं बलाही , त अगोरा रही सबला लोक परलोक के नवा डेट के, कलम ल रोकत इही कहिहूं कि
सब ओके करव
तब डेट तय करव
सावधानी ही बचाव हे
इही गोठ गुनव
चम्पेश्वर गोस्वामी
